الأحد، 29 نوفمبر، 2015

اعترافات زوجة خائنة : خنت زوجي لكن أحبه دلوني

اعترافات زوجة خائنة : خنت زوجي لكن أحبه دلونيهذه اعترافات زوجة خانت زوجها ، رغم حبا له .. تابعوا تفاصيل القصة على لسانها.
مشكلتي بدت من بعد زواجي ب 6 شهور انا عصبيه وعنيده وزوجي كذلك
صفاته طيب وكريم ورومنسي بس مزاجي يعني وقت مايكون رايق اطلب اللي ابي ووقت مايكون متنرفز
لو اطلب ايش رفض وعصب وتكلم طبعا تقلب مزاجه من ايش مدري
يحبني واعرف هالشي لكن مشكلته كتوم وفجأه ينفجر لاجينا نتفاهم مانعرف لازم نتهاوش اذا جينا نسولف لازم نتهاوش

السبب مدري لدرجة اول مانبدا سوالف وبدينا بالحماس اقوله سكر الموضوع مالي خلق هوشات
اتكالي بشكل فضيع يعني اذا بيروح الدوام مفاتيحي وينها جزمتي وانتو بكرامه وينها لدرجة يصحيني من النوم واوقات اكون
اتجهز للدوام ومستعجله ماعندي وقت ادور معه اغراضه يقول انتي ماتهتمين اذا قال هالشي وينه اقوله مدري عنك
يعني مفاتيحه واغراضه الخاصه يسألني عنها واذا قلت مدري قال اصلا انتي ماتدرين عن شي :) !!
ويعصب ويتنرفز يعني اذا ضاع شي لازم اتحمس وادور معه عشان يحس اني مهتمه متعب جدا
اخس شي لاخرب نومتي وقال هالشي وينه .طبخي ماعجبه والسبب يبي كبستي مثل امه مع ان اهله منهبلين ع طبخي
ماعنده ثقه بنفسه لدرجة يقول ماتبين احد يشوفني معك لاني مو وسيم وقت اقوله خير انا مااخذتك الامقتنعه فيك وانا افضل منه بالشكل بفرق كبير
يقدس اخوياه بشكل مو طبيعي بما اني سكنت بمحافظه حول الرياض ماتبعد الا ساعه وشوي عن الرياض
ف اغلب شي نتقضاء من هناك ومسكات نروح نتمشى ونرجع مايقصر كان يوديني وسط الاسبوع كل اسبوع مع اني الويكند اروح الرياض لاهلي
ومع ذلك عادي عنده مره قلت له ابي اروح الرياض نتعشى رفض من بكره قلت له رفض وانت تحبين المشاوير ! قلت اوكي
طلعت لصديقتي وثم فجاءة بعد ساعه قال زوج صديقتي حنا فالرياض تبون شي !! راح وخويه وانا كم يوم اترجاه رافض
مره رحنا الرياض تو واصلين ونقضي دق جواله وقالو اخوياه ننتظرك ع العشاء بنشوي قال انا رايح الرياض قالو بننتظرك ترجع
وربي انقهرت مرره قال يلا بسرعه مشينا قلت ع وين ! قال بنرجع ماقال اخوياي المهم وطاير بالرجعه وحطني فالبيت وطلع لهم
وياكثرها ايام يتركني عشان اخوياه وطول الاسبوع طبعا نجي من الدوام سوا نتغداء ووننام نرتاح اصحى قبل المغرب بشوي مالقاه !
وماشوفه الا 12 مرات1 ومرات 2 يطلع لاستراحة اخوياه ثم يرجع للنوم وهكذا عاد كل شهر يمكن مايطلع 4 ايام بس
واذا قلت له انت طلعاتك كثيره قال لاتتبليني انا اجلس فالبيت !!! ههه وربي انجلط لاقالها قلت لايكون تسوي الشي وتنساه !
طبعا بعيده عن اهلي والحبايب تعرفت ع كم بنت وازورهم ويزوروني بس مو زي الاهل متى ماحبيت طبيت عليهم
طفشت اكتئبت لحالي خلاص لدرجة بس يجي احس ودي اطرده من البيت تجي للنوم والاكل بس واناااا ! لانفجرت عليه
من بكره يأنبه ضميره ويجلس يتقهوا معي وكانه ع نار وبعدها يطلع زي العاده
قالو لي يمكن ماتكشخين يمكن ماتسولفين معه يمكن ويمكن وصدقتهم ! لدرجة مرا مو كشخة كشخة للبيت وله لا
كاني بطلع وفكيت شعري ووالجنز وعطرت البيت واسوي قهوه كان وقتها نايم صحى ومر علي وقال شعندك كاشخه قلت اشتهيت اكشخ
قال اها وثم شويات الا اسمع صووت باب الشقه ينصك :) ! طيب والكشخه والقهوه عليهم السلام
كذا لاكشخت يتغزل وهو طاير وبعدها اسمع صوت الباب .. وصلت لدرجة خلاص طفشانه
كنت بترك الدراسه بس كل ماتذكر اني بصير لحالي كذا وش بتصير حياتي نوم واكل وكرف ع الاقل الدراسه مشغلتني خليني عليهآ
طبعا غلطت بحقه بعد 6 شهور من زواجنا او 8 شهور كنت اسولف مع واحد بالتويتر يومين يصبح ويمسي وانا من الطفش ارد ماكان فراسي شي
وطاح في المحادثه طبعا عرفت من وقتها ان نظامه تفتيش لجوالي من وراي ! سوا سالفه وسب وهاوش وقال ضفي ملابسك وكلم ابوي وقاله
ابوي قال جب البنت ويصير خير طبعا وقتها تنرفزت وقلت له سامحني وكذا ماتقبل مني شي وقال ماتوقعتها سكت
ورحت لاهلي جلست اسبوع وراضيته واعتذرت وقلت سو اللي تبي فيني بس لاتتركني كنت وقتها بداية تعلق فيه
لان مع الدراسه ماكنت اجي عند اهلي اسبوع طول الايام معه بس يفصلنا ويكند والويكند يجي ينام معي عند اهلي واهله بديره ثانيه وااذا رحنا لهم لنا غرفه
هو مايقدر يفارقني بالنوم لدرحة اذا نمت عند اهلي وهو عند اخوه يزعل ويقلب نفسيه وصار يكره لاجيت لاهلي بس يتضايق وانتي تهمليني !!!!!
كنت اتضايق من هالشي هذولا اهلي تبي اقاطعهم !! طبعا لانه مايقدر يفارقني سامحني ورجعت ورجعنا زي ماكنا نفس الاطباع
سافرنا سفره ثانيه لبرى وطول السفره كان متضايق مع انه هو اللي حاجز وكل شي ومتحمس كان يبيني امشي وانا عجاززززة اتعب بسرعه
مافي لياقه وهو راعي لعب كورة وجسمه رياضي وكل مانمشي واتعب واقول له نجلس يعصصب !! وكانت نفسياتنا ززفت ههه الناس
تسافر تغير جو وحنا طقاق وهوشه ننام ع هوشه ونتمشى ع هوشه لدرجة وحده كانت بتعرض لنا حاجه بيع وقالت ايش فيها المدام زعلانه كان
واضح علي مررا رجعنا وتمشكلنا فبيت اهلي وكانو اهلي مسافرين رجع ابوي بعدها بيوم وجلس زوجي معه وكان كاتم
وفضفض لابوي بنتك وبنتك وبنتك ماخلا شي الا قاله ماتحترم ماتقدر ! ابوي انصدم وتضايق وابوي ياعمري راعي ضغط تعب بعدها
وجيت له لقيت زوجي مبسوط ومرتاح طبعا فضفض وابوي طيب خاطره وانا مدري عن شي رجعنا لديرتنا صحيت من بكره لقيت رساله طويله
من ابوي نصح قلت يبه شسالفه قال يابنتي زوجك يشتكي منك ويقول ماتقدر ماتحترم ومدري ايش !!!!!!! كان انصبت علي مويه حاره
توه معي يسولف قلت يبه بقولك شي صح انا ساكته ولاعمري فضفضت لك عنه مابي اشوه صورته قدامكم!! بس دامه تكلم بقولك
قلت كل شي يسويه لي وصلت للضرب مو المبرح ! لا الضرب اللي ع كتفي او مره بالعقال ع كتفي يرمي ع وجهي اي شي
قالي مره انتي شغاله ومره قال ماتربيتي ومره قال بنت شوارع وكلام يجرح ودايم انا بتزوج انا بتزوج من اول شهر قالي
اهانات وكلام ماله اول ولا تالي هو صحيح طيب بس لاعصب اعوذ بالله قال ابوي هذا ماتجلسين عنده بعد يضرب
قال انا بكلمه قلت يبه بالهداوه لاتنسى انا عنده واخاف يسوي لي شي ابوي كلمه ومدري شقال له جاني منقلب وجه
ويقول يله بوديك تشترين تنورة وقلت يلا قلت شكله بيرجعني لاهلي هههه وسوست رحت شريت ورجعنا
بعدها الرجال احترمني شوي وتأدب يوم حطني عند اهلي قال ابوي مافي رجعه قلت يبه تعدل وانا برجع لسى الترم باقي شهرين بس
حرام اوقف قالو طيب ورجعت معه بعدها بشهور شاف بجوالي رقم غريب كان واحد يتحرش وانا ما اكذب كم مره ارد واهاوشه ويسولف واسولف
بسس بطريقة هواش وتهزيء شاف اغلب المكالمات راده عليهآ حط الرقم بالنمبر بووك وشاف اسمه ولد وسكت
وهو موديني لاهلي قربنا للبيت قال هاتي جوالك ! هالرقم لمين ! بلعت ريقي ماعاد عرفت اتكلم قلت صديقتي ماعرف اكذب ويوضح علي
قال كذابه هذا ولد وهزء هزء قلت بفهمك السالفه رففض ونزلني وقال لاعاد تدقين علي وبطلقك قلت لحظه وعصب ونزلت
ماعاد قدرت اتكلم مع احد شسويت اانا اراسله يهزئني ويطنش سكت كم يوم وبعدها فهمته ورضى ورجعت بعد اسبوع جيت ازور اهلي
كنت منشغله بحفلة تخرج اختي وقال له اخوي شاركنا قال بسافر ظنيته يمزح مادريت بالليل الا حاط صورة العرض بالواتس صورته وخويه بمكه
وادخل واعصب عليه اااايه ماتقول لي ماصرت زوجه واقول لك عطني فلوس وتقول مامعي والحين طلعت الفلوس وسافرت
اساسا انت اناني همك نفسك متزوجني للخدمه بس وللفراش كم لي اترجاك مكه ومطنش انفجرت ووقتها نفسيتي زفت ماخليت شي ماقلته
وش رد علي ؟؟ قال وش مصبرك علي ! اجلسي عند اهلك وسوا لي بلوك صرت ادق ادق ادق ويعطيني مشغول ظليت ادق
يمكن 50 مكالمه ولارد وجا اليوم اللي بيرجع من مكه ضنيته بيمرني ويرجع يداوم كشخت وجهزت اغراضي ادق مايرد ادق مايرد
لحد الفجر جالسه مانمت انتظره ابوي استغرب ها وينه وصل قلت لا اممم مدري عنه قال ماكلمتيه قلت الا مارد
قال نامي اجل قلت طيب بعد يومين ابوي راح انتداب وراسلني قال مارجعتي قلت لا قال شفيكم وقتها انفجرت ع ابوي
وقلت مايرد علي ومسافر بدون مدري و و و و فضفضت ابوي تعاطف وقال خلاص بكلمه واشوف
كلمه ابوي وانفجر ع ابوي بنتك فيها وفيها وبعد لقيت رقم تكلمه فجوالها جاب العيد وقال كل شي
ابوي توهق جا جلس معي وشفيك ومدري ايش وعلمته كل شي بعد اسبوعين تطنيش ارسل لي زوجي واتس ترى انا طلقتك طلقه !!
سكت وانجرحت كل هذا يعني الرقم حق الولد ماطلق بس عشان تضايقت من سفرته !! كان وقتها كاتم وانفجر علي
سكت بعد اسبوع راسلني وانا ابيك واحبك وانا جلست اتعذر وقال بكره بجي اخذك قلت وين كلم ابوي قبل انت طلقت مو شي سهل
واهلي مررا متضايقين ومتنرفزين منه المهم كلم ابوي وابوي تضايق وقال مافي رجعه قلت يبه انا كنت غلطانه وبرجع
قال ابوي ولو بنات الناس ممو لعبه قلت يبه ماعليه وانا مستخيره وحنيت قال بكيفك رجعت له جا واخذني وكان مواصل وتعذر وتدليع
ورجعنا للبيت اكتشتف انه رجعني لانه كان يبي الفراش !!!! من بكره رجع يعاتب ويهاوش ! وجلست اتعذر مره ثانيه
المهم رجعنا حلوين وسلكنا الامور وكذا سافرنا وانبسطنا ومعنا اخته لاحظت ان السفره لحالنا بتنقلب نكد لان سفرة شهر العسل معنا زميله عريس
وكان ملطف الجو وانبسطنا وياهم
اخر مشكله شافني وانا احش فيه مع وحده من صديقاتي وهزءني وحرمني منها ومشيتهآ مع انها الوحيده اللي مونستني وازورها باستمرار
كنت انزل صور فالاستقرام ووقفت فتره طويله لما نزلت صور سفرتنا ارسل لي واحد بالخاص كان دايم لايكات وكذا
وينك ووحشتيني ومن زمان مانزلتي وخفت عليك ؟؟
طبعا انا ذوقا مني رديت وكنت بحذف السوالف واسوي له بلوك والله 3 مرات ابحذفها شي يردني لما شافها زوجي
سبحان الله يطيح فيني دايم مع انه فالها مع بنات عمه وقروبات وسوالف هم متفتحين ودوامه اختلاط بس انا يتنرفز مرررا
وقته يوم شاف سكت يومين يوم جا الويكند قال مو اروح الرياض تقولين اجلس معي لا قلت اجل طول الاسبوع ماقلت لك اجلس معي
وهناك بيت اهلي فاضي تبي اجلس لحالي وانفجرت كنت مضغوطه طول الاسبوع ماجلست معه وانفجر هو وقال ترى انا ماني ديوث ومدري ايش
ومسك جوالي وطلع السوالف خلاص بطيح من طولي واتعذر منه قال ابعدي عني ماعاد ابيك وضفي عفشك كله ماعاد فيه رجعه حاولت اتعذر رافض
ضفيت عفشي اغلبه ونزلني عند اهلي وراح لقيت ابوي بس فالبيت شافني قال زوجك وينه ! قلت راح يبه انا مواصله بنام قال طيب راح شاف شنطتي الكبيره
قال شفيكم صاير شي قلت يبه ايه وقال لي ورقتك الاحد بتجيك قال ابوي في شي جديد قلت لا زي العاده قال اكيد قلت ايه
<< علمت ابوي لاني ضنيته بيطلق ع كلامه لو داريه كان سكت ماعبيت راسه
طبعا مابيه يدري عن السوالف اللي مع الولد واتفقت وزوجي كل واحد يستر ع الثاني ووافق المهم بعد اسبوع ابوه تدخل فالموضوع وشكله
ززززن ع زوجي لما انفجر وقال تكلم عيال ابو زوجي علاقتي فيه ممتازه كلم ابوي وقال ترى بنتكم تكلم ومدري ايش يعني شتبي الولد يسوي
قال ابوي طيب يطلقها قال ابوه الولد رافض انا طبعا ماعاد كلمته اببد قال ابوي لاعاد تكلمينه قلت طيب يوم دريت انه رافض الطلاق
قالت امي يمكن يبي المهر قال ابوي مهره يرجع وقال ابوي انتي تكلمين اولاد يقول قلت يبه والله يكذب هالشي قديم قال ابوي اكيد يكذب قلت ايه
وانا من جوا موجعني قلبي اني كذبت وحلفت بعد بس شسوي ليه بيطلق ويشوه السمعه بعد المهم كتبت له بالواتس ليه تقول لابوك وكتبت لابوه
انو لاعاد تكلم اهلي تبي ابوي يجيه شي ولاعاد تصلح خلاص انتهى اللي بينا
ارسلت لزوجي وصرنا نتعاتب قلت له انا لحالي بين الجدران وانت ماهتميت فيني انت تخليني اسوي هالامور قال لاتبررين لنفسك
ويعاتب يعاتب الزبده قبل كم يوم قال لي ليه ابوك مادق ولافكر يعتذر او شي قلت ابوي ماله ذنب وانت حطيتني ع انك بتطلق وابوي خلاص
يعتبر كل شي انتهى .. قلت له اني بطلب الخلع قال شوفي الشيخ بيحلفك بالمصحف اذا صادقه ويبين الحق هناك وانا بقوله اني مابي الطلاق قلت
شلون مو حطيتني ع انك بتطلق قال كنت ابيك تتأدبين !!!!!!!!!!! قلت خليتني اقول لاهلي طلاق وهالسوالف وخلاص اهلي مايبوني ارجع
اهلي كرهوه وخلاص زي اللي يبون الفكه بس بعد شهر من البعد احس فقدته جدا وحسيت اني احبه وهو كذلك
زوجة زميله تقول زوجي يقول زوجك مررا مكتئب ومتضايق ومحزن وماله خلق ابببد وهالشي ادري لانه فقدني
الحين سؤالي اهلي كارهينه ويقولون خلاص الطلاق لدرجة جدتي تكلم امي تقول شصار معها قالت امي خلاص بيطلقها وامي تعلمني ومبسوطه
تقول جدتك قالت ايه ازين لها من هالبعيد طبعا مايقرب لي هو عن طريق زميل ابوي يعرف هالشخص
الحين اهلي مقتنعين بالطلاق ولايبوني ارجع كيف اقنعهم انا ابييه ويوم كلمته قال طيب اهلك ماتصلو ماقالو شي
وقال لي انتي ارجعي للبيت خلي احد يجيبك
انا احترت هل بالقوه اقول لاهلي برجع له وكذا واهم على بالهم اننا مانتواصل !! مع ان هذا زوجي للحين
او انتظر ابوي يكلمه او ايش اسوي ياربي احترت الرجعه الاخيره يوم يطلق طلقه مرا تضايقوا اهلي برجعتي
ف مابالكم بهالمره تاركني شهر زوجي حاولت فيه يدق ع ابوي رفض قلت تعال خذني انا زوجتك قال ابوك ماتصل
وخلي احد يجيبك قلت له ابوي ماله ذنب بالسالفه انا الغلطانه وانت اللي حطيتني ببيت اهلي محد غصبك شلون اخوي يرجعني للبيت
وش الشي اللي مفروض اسويه بهالموقف
انا ابي زوجي واحبه وهو كذلك بس عزة نفسه ترده وده يرجعني بس قصده يبي اهلي يكلمونه او يتعذرون
اقول لابوي يكلمه ويتفاهمون او اصبر او ايش مع ان زوجي للحين يقول انتي مكذبتني وحطيتيني اتبلى عليك وقلت ماسولفت مع ولد وحلفتي
اذا بكلم ابوك بقوله وانا عجزت فيه اقوله استر يابن الناس ويقول واطلع كذذاب يعني بيفضحني عند ابوي وانا حالفه له اني ماسولفت مع ولد :) !
والله محتاره كيف اتعامل بزي هالموقف ادري اهلي بيوقفون ضدي بس شسوي !!
واهله كانو يحاولون الصلح ورفضت وقلت لاعاد تصلحون مالي وجه اقولهم اصلحووا !!
احس اهلي يبون الفكه لدرجة ابوي يقول اسحبي ملفك وامي تقول يلا نجيب عفشك الباقي وقتها اسكت مدري كيف بقولهم لا ابيه
لاني عبيت راسهم بعيوبه وقالو كيف جالسه معه وامي اساسا من اول ماخطبني ماكانت موافقه عليه بس ماقدرت تقول شي
امي يعني تبيها من الله وتقول لي انت مو اول وحده تتطلقين !
واختي تقول كويس ماصار حمل بهالسنتين !
يالله متلخبطه افكاري !!!! كيف احسسه اني احبه لانه يقول اللي تخون ماتحب ادري هالشي صح لكن انا احبه !
دلوني وادعوا لي ربي يفرجهآ
Related Posts Plugin for WordPress, Blogger...